Ministrja e Industrisë, Ndërmarrësisë dhe Tregtisë, znj. Rozeta Hajdari, ka takuar menaxhmentin e lartë të kompanisë së fluturimeve WizAir, me të cilët diskutuan mundësitë e bashkëpunimit mes Republikës së Kosovës dhe Emirateve të Bashkuara Arabe për vendosjen e linjës së re direkte Prishtinë-Abu Dhabi.
Ministrja Hajdari informoi menaxhmentin e lartë të kësaj kompanie lidhur me kontekstin ekonomik të Kosovës, duke shtuar se krijimi i një linje të re udhëtimi do të krijonte mundësi të shumta për rritjen e tregtisë, investimeve dhe zhvillimin e turizmit.
Ndërkaq, nga WizAir u tha se të njëjtit do të krijojnë kontakte me Autoritetin e Aviacionit të Kosovës, për të parë mundësitë e krijimit të kësaj linje, në mënyrë që e njëjta të vihet në funksion në të ardhmen e afërt.