Investitori francez, z. Dominique Guérity, së bashku me ndërmarrësen kosovare znj. Leonora Morel, që ka jetuar në Zvicërr deri në vitin 2015 dhe është kthyer në Kosovë me veprimtarinë e saj afariste Eco Exclusive Sh.p.k prezantuan projektin investues ” Horizonti i Gjelbër” për të krijuar një fermë agroturizmi moderne në rajonin e Kaçanikut, që përfshin disa komponente, si përmirësimin e teknologjisë së prodhimit dhe krijimin e qendrës së trajnimit për ngritjen e aftësive profesionale në prodhimin e gjelbër.
Gjatë diskutimit, u prezantuan planet afatshkurtëra dhe afatgjata të investimit në ndërtimin e fermës për një tufë prej 100 lopësh dhe 50 viçash, paisjet robotike për qumështin dhe higjienën, ruajtjen dhe përpunimin e qumështit në djathë të rafinuar me metoda franceze, trajtimin e mbetjeve organike për të prodhuar biogaz për ngrohjen e fabrikës, ndërtesën e strehimit studentor "klasa e gjelbër", disa shtëpiza të vogla për akomodim të turistëve dhe një hapësirë të jashtme për të organizuar aktivitete të ngjarjeve të ndryshme të tregut.
Ministrja Hajdari e vlerësoi lartë projektin investues " Horizonti i Gjelbër" me ndikim në rritjen e qëndrueshme ekonomike dhe zhvillimin rajonal, si dhe përfshirjen e studentëve dhe të rinjve kosovarë në këto projekte, përmes mundësive të trajnimit dhe rritjes së bashkëpunimeve në mes industrisë dhe akademisë.
Ajo ofroi mbështetjen e saj në iniciativën e z. Guérity dhe bashkëpuntores së znj. Morel, përmes lehtësimit të komunikimit të tyre me institucionet shtetërore, për realizimin e këtij investimi në një hapësirë tokësore prej 30.5ha në pronësi të Agjencisë së Pyjeve të Kosovës dhe parcelën tokësore prej 4.82ha në pronësi të komunës së Kaçanikut.
Ligji i ri për Investimet e Qëndrueshme nxit dhe mbron investimet e përgjegjshme dhe të qëndrueshme në Republikën e Kosovës.
