Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, mori pjesë në hapjen e seminarit informues për zbatimin praktik të Marrëveshjes së Tregtisë së Lirë Kosovë–EFTA, të organizuar nga MINTI në bashkëpunim me Sekretariatin e EFTA-s.
Marrëveshja, e cila ka hyrë në fuqi më 1 tetor 2026, u mundëson bizneseve të Kosovës qasje në tregun e katër shteteve anëtare të EFTA-s, Zvicrës, Norvegjisë, Islandës dhe Lihtenshtajnit, me rreth 30 milionë konsumatorë dhe fuqi të lartë blerëse.
Në seminar morën pjesë zëvendës sekretari i përgjithshëm i EFTA-s, Markus Schlagenhof, zëvendës shefi i Misionit të Zvicrës në Kosovë, Christoph Fuchs, zyrtarja për Kosovën në Sekretariatin e EFTA-s, Laura Störi, si dhe ekspertë të tjerë të përfshirë në zbatimin e marrëveshjes.
Gjatë fjalës së saj, ministrja Kusari-Lila prezantoi të dhënat mbi shkëmbimet tregtare me shtetet e EFTA-s, duke theksuar se gjatë vitit 2025 eksportet e mallrave të Kosovës drejt këtyre shteteve kanë tejkaluar 100 milionë euro, me rritje prej 15 për qind. Ndërkaq, në tregtinë e shërbimeve, Kosova ka realizuar suficit prej 2.37 miliardë eurosh, me Zvicrën si partnerin kryesor tregtar në këtë sektor.
Ajo theksoi se qasja në tregjet e EFTA-s krijon mundësi për ndërmarrjet vendore që të zgjerojnë kapacitetet prodhuese, të diversifikojnë produktet, të investojnë në teknologji dhe të krijojnë partneritete me kompani të konsoliduara. Këto bashkëpunime mundësojnë shkëmbimin e njohurive dhe ekspertizës, ngritjen e standardeve të menaxhimit dhe integrimin e bizneseve kosovare në zinxhirët evropianë të vlerës.
MINTI, në bashkëpunim me Doganën e Kosovës dhe partnerët ndërkombëtarë, do të vazhdojë të ofrojë mbështetje praktike për bizneset, me qëllim që ato të shfrytëzojnë mundësitë që ofron marrëveshja dhe të rrisin eksportet, investimet dhe punësimin.

