Sipas Ligjit për Tregtinë me Mallra Strategjike, Dogana e Kosovës është përgjegjëse për mbikëqyrjen e eksportit, importit, tranzitit, trans-ngarkimit dhe çdo procedure tjetër doganore që lidhet me mallrat strategjike. Ajo është përgjegjëse edhe për vlerësimin e pajtueshmërisë së mallrave me licencën e lëshuar.
Personat që synojnë të angazhohen në eksport, import, transit ose trans-ngarkim të mallrave strategjike duhet t’i nënshtrohen zhdoganimit kur sjellin mallra në Kosovë dhe që i nxjerrin ato nga Kosova:
Cila është procedura doganore për mallrat strategjike të licencuara?
Tregtari ose agjenti së pari duhet ta dorëzojë licencën origjinale në doganë, së bashku me deklaratën doganore, në kohën e zhdoganimit.
Dogana më pas e krahason informacionin e miratuar në licencë me informacionin e paraqitur në deklaratën doganore dhe në dokumentacionin tjetër.
Bartësi i licencës duhet t’i jep informatat e mëposhtme në deklaratë:
- emrin e plotë dhe adresën e bartësit të licencës;
- numrin e licencës për eksport, import, transit ose trans-ngarkim për të cilën është iniciuar procedura doganore;
- përshkrimin e mallrave në pajtim me licencën e lëshuar;
- sasinë e mallit në njësi matëse të shënuar në licencë;
- vlerën e mallrave të shprehur në valutën e përcaktuar në licencë;
- nomenklaturën e duhur tarifore për mallrat;
- Numrin e klasifikimit të mallrave, bazuar në Listën Shtetërore të Kontrollit
- klasifikimin e mallrave të rrezikshme, nëse është e zbatueshme.
Kur Dogana e kontrollon licencën dhe deklaratën, verifikon:
- Nëse numrat e klasifikimit tarifor në licencë dhe në deklaratë korrespondojnë me njëra-tjetrën
- Nëse mallrat që transportohen përputhen me numrin e listës së kontrollit të identifikuar në licencë
- Nëse përshkrimi i mallrave në licencë korrespondon me përshkrimin e mallrave në deklaratë
- Nëse sasia dhe vlera e mallrave të deklaruara në Doganë lejohen që të transportohen sipas licencës
- Nëse marrësi i dërgesës/përdoruesi i fundit i identifikuar në licencë është i njëjtë me atë të identifikuar në deklaratë dhe në dokumentacionin tjetër
- Nëse destinacioni i identifikuar në deklaratë dhe në dokumentacionin tjetër është i njëjtë me lokacionin e identifikuar në licencë
Licencat e lëshuara nga Ministria e Tregtisë dhe Industrisë e identifikojnë sasinë dhe vlerën e miratuar të artikullit që mund të tregtohet me licencë. Personi që importon, eksporton, kalon tranzit ose trans-ngarkon mallra strategjike të licencuara e ka opsionin që mos ta dërgojë tërë sasinë ose vlerën e miratuar në një dërgesë. Sa herë që bartësi i licencës dërgon mallrat e lejuara sipas licencës, Dogana do ta tregojë me sa vijon në licencë:
- Sasinë apo vlerën ende në dispozicion
- Sasinë apo vlerën që duhet të zbritet
- Dokumentin doganor dhe datën e zbritjes
- Nënshkrimin dhe vulën e Doganës së Kosovës
Çka ndodh nëse tentoni t’i zhdoganoni mallrat strategjike pa leje?
- Procedurat e vlerësimit të rrezikut doganor përfshijnë shqyrtimin e mallrave strategjike;. Dogana mund ta shënojë dërgesën tuaj për ekzaminim për të konfirmuar se mallrat tuaja nuk kërkojnë licencë.
- Dogana mund t’i ndalojë mallrat tuaja derisa të përcaktojë nëse kërkojnë licencë. Dogana mund ta kërkojë ndihmën e Ministrisë së Tregtisë dhe Industrisë për ta konfirmuar statusin e licencës së mallrave.
- Nëse mallrat tuaja kërkojnë licencë, nuk do të lejoheni që të vazhdoni me procedurën doganore derisa ta merrni licencën e nevojshme nga Ministria e Tregtisë dhe Industrisë.
Nëse Dogana e Kosovës vërteton se është shkelur Ligji për Tregtinë e Mallrave Strategjike, ajo mund ta lëshojë një urdhër në të cilin do të përcaktohet afati kohor brenda të cilit duhet të korrigjohen parregullsitë.
Nëse Dogana e Kosovës zbulon shkelje të ligjit, atëherë incidenti mund të vazhdojë në hetime administrative ose penale.