Ministrja e Ministrisë së Industrisë, Ndërmarrësisë dhe Tregtisë, znj Rozeta Hajdari dhe Kryetari i Komunës së Shtimes, z. Qemajl Aliu, nënshkruan Marrëveshjen e Bashkëpunimit për Projektin e Parkut Teknologjik në Shtime.
Qëllimi i kësaj marrëveshje të bashkëpunimit është investimi për realizimin e projektit të Parkut Teknologjik në Shtime, si dhe përcaktimi i obligimeve të Ministrisë dhe Komunës për realizmin e projektit në fjalë.
Ministria e Industrisë, Ndërmarrësisë dhe Tregtisë do të financojë projektin/kontratën “Renovimi i infrastrukturës fizike në Parkun Teknologjik në Shtime” brenda kufijve buxhetor të paraparë në harmoni me Ligjin për Buxhetin e Republikës së Kosovës dhe Kornizës Afatshkurtër të Shpenzimeve (KASH).
Vlera e parashikuar e investimit për renovimin e infrastrukturës fizike të këtij Parku Teknologjik, me hapësirë prej 10.70 ha, do të jetë 179,263.10 euro për realizimin e kontratës, të cilën do ta financoj Ministria e Industrisë, Ndërmarrësisë dhe Tregtisë.
Infrastruktura fizike e Parkut Teknologjik në Shtime, është në nevojë për renovim, për shkak të mungesës së investimeve dhe mirëmbajtjes se infrastrukturës fizike, që nga viti 2008.
Ministria e Industrisë, Ndërmarrësisë dhe Tregtisë, përmes reformës së re legjislative dhe investimeve kapitale në ndërtimin e parqeve industriale e teknologjike, synon:
– Nxitjen e investimeve,
– Promovimin e teknologjive të avancuara, aktiviteteve të prodhimit dhe përpunimit, inovacionit dhe shërbimeve me vlerë të shtuar,
– Rritjen e punësimit dhe trajnimit,
– Lehtësimin e punësimit dhe trajnimit,
– Rritjen e konkurrencës dhe eksporteve.