Ministrja e Ministrisë së Tregtisë dhe Industrisë, Hykmete Bajrami, takoi sekretarin gjeneral të Konferencës së Hagës mbi të Drejtën Ndërkombëtare Private (HCCH), z. Christophe Bernasconi, me të cilin diskutoi për mundësitë e inicimit të anëtarësimit të Republikës së Kosovës në Konventën e Hagës për Vulë Apostile.
Ministrja Bajrami tha se një nga objektivat kryesore strategjike për Ministrinë e Tregtisë dhe Industrisë dhe Qeverinë e Republikës së Kosovës, është që të përmirësojë klimën e biznesit në Kosovë, në mënyrë që të krijohet ambient sa më tërheqës për investimet e huaja direkte në Kosovë. Prandaj, duke u bërë pjesë e mekanizmave të rëndësishëm ndërkombëtarë, siç është edhe Konventa e Hagës për Vulë Apostile, do të përmirësohen kushtet e të bërit biznes për kompanitë e huaja që të investojnë në Kosovë, por edhe për qytetarët e Kosovës, që të punojnë dhe udhëtojnë ligjërisht dhe pa kufizime.
Bashkëbiseduesit u pajtuan se me pranimin e Kosovës në Konventën e Hagës për Vulë Apostile do të thjeshtësohet procesi i gjatë i legalizimit të dokumenteve. Kjo do të forcojë më tej sektorin privat në Kosovë, dhe do të lehtësojë lëvizjen e lirë të mallrave, shërbimeve dhe njerëzve.