Nën Patronatin e Zyrës së Kryeministrit të Republikës së Kosovës u bë hapja e edicionit të 21-të të panairit ndërkombëtar EXPOKOS, i cili i dedikohet sektorëve të Ndërtimit, Energjisë, Makinerisë, Mbrojtjes dhe Sigurisë.
Në këtë ngjarje, që i dedikohet ndërtimit, energjetikës, teknologjisë dhe patundshmërisë, morën pjesë Zëvendëskryeministri i Republikës së Kosovës, Besnik Bislimi, Ministrja e Industrisë, Ndërmarrësisë dhe Tregtisë, Rozeta Hajdari, Ministrja e Ekonomisë, Artane Rizvanolli, Kryetari i Dhomës Ekonomike të Britanisë në Kosovë, Mariano A. Davies, Ambasadori i Republikës së Shqipërisë në Kosovë, Qemal Minxhozi dhe përfaqësues të tjerë nga ambasadat e rajonit dhe ato ndërkombëtare.
Ministrja Hajdari theksoi se Kosova është një shtet i sigurt sidomos tani pas krizës së COVID-19 dhe ndryshimeve gjeopolitike, ku përpos rritjes ekonomike dhe përparësive për investime, ka rritje të lartë të demokracisë dhe sigurisë së investimeve.
Në këtë kontekst, Ministrja Hajdari tha se Republika e Kosovës, falë parimeve të qeverisjes së mirë, përparësive konkurruese për ‘nearshoring’, renditet e para në rajon me rritje në raportet e ndryshme ndërkombëtare, të cilat vlerësojnë demokratizimin e vendit, sundimin e rendit dhe ligjit dhe të drejtat dhe liritë e njeriut.
“Të gjithë këta tregues pozitiv për imazhin e shtetit tonë, janë mesazh i mirë për çdo investitorë për të investuar në Kosovë”, shtoi Ministrja Hajdari.
Në Panairin e Ballkanit Perëndimor – EXPOKOS, i cili është i njohur si “Porta e Ballkanit”, i cili po mbahet më 25 & 26 maj 2022, po marrin pjesë 21 kompani prodhuese vendore dhe ndërkombëtare të sektorëve të ndryshëm.
