Ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka zhvilluar një takim në Mitrovicën e Veriut me përfaqësues të disa bizneseve kosovare që operojnë në atë pjesë të vendit, pas shtrirjes së plotë të institucioneve të Republikës së Kosovës në veri.
Gjatë takimit, ministrja i ka falënderuar bizneset për vendimin e tyre për të investuar dhe operuar në Mitrovicën e Veriut, ndërsa ka dëgjuar edhe sfidat me të cilat po përballen në zhvillimin e aktiviteteve të tyre ekonomike.
Sipas Kusari-Lilës, është inkurajuese që bizneset e hapura në atë pjesë janë të gatshme të punësojnë qytetarë të të gjitha komuniteteve dhe etnive, pa diskriminim dhe në përputhje me legjislacionin e punës në Kosovë.
Ajo ka theksuar se përfaqësuesit e bizneseve e lidhin vazhdimin e stabilitetit dhe sigurisë në veri me zhvillimin ekonomik, rritjen e punësimit dhe përmirësimin e standardit të jetesës për qytetarët.
Ministrja ka ritheksuar se Qeveria e Republikës së Kosovës mbetet e përkushtuar për të punuar në rritjen e aktivitetit ekonomik dhe krijimin e vendeve të reja të punës në të gjithë territorin e vendit, pa dallim.
