Zëvendësministri i Tregtisë dhe Industrisë, Faton Thaçi, priti sot në takim zëvendës ambasadorin e Mbretërisë së Bashkuar në Kosovë, Tom Adams, ku zv/ministri Thaçi, fillimisht, e njoftoi për të arriturat dhe objektivat e Ministrisë së Tregtisë dhe Industrisë (MTI) në rritjen e produktivitetit të saj në ofrimin e shërbimeve në të mirë të rritjes së investimeve të jashtme dhe zhvillimin e investimeve të brendshme.
Thaçi më tej e njoftoi z. Adams me përgjegjësitë dhe obligimet me të cilat është e ngarkuar Ministria e Tregtisë dhe Industrisë.
Zëvendës ambasadori Tom Adams shprehu gatishmërinë për bashkëpunim të ndërsjellë në mes të MTI-së dhe ambasadës së Britanisë dhe njëkohësisht kërkoi përkrahje të investitorëve britanikë lidhur me mundësitë e investimeve të tyre në Republikën e Kosovës.
Zv/ambasadori i Britanisë tha se Kosova është mundësi e mirë për të investuar pasi që ky vend ka pasuri te mëdha natyrore duke përfshirë resurset natyrore dhe ato humane.
Në fund të këtij takimi, zëvendësministri Thaçi falënderoi zëvendës ambasadorin e Mbretërisë se Bashkuar në Kosovë z. Adams dhe shprehu mirënjohje përmes një dhurate.
